ایک دل ہی جو رازداں ہوتا
تب نہ شاید وہ بدگماں ہوتا
گر نہ دُکھڑا مِرا بیاں ہوتا
پھر تو جی کا بہت زیاں ہوتا
کیسے تجھ کو تلاش کر پاتا
ہر کسی پر تِرا گماں ہوتا
روگ ہوتا نہ جان کو لاحق
گر نہ تیرا کہیں نشاں ہوتا
اِن جہانوں سے ہم نے کیا لینا
ایک اپنا ہی بس جہاں ہوتا
سیر اپنی تو روز ہو جاتی
پاس‘ گر کوئے دلبراں ہوتا
اپنی قسمت خوشی سے ہے خالی
چُپ نہ رہتا تو نوحہ خواں ہوتا
مصلحت کوش گر نہ تُم ہوتے
سر تمہارا بھی بر سِناں ہوتا
راز اکثر تو راز ہی رہتے
رُخ جو دل کا نہ ترجماں ہوتا
تیرے ہوتے ضیاؔ سبھی دشمن
تُو جو محبوبِ گُل رُخاں ہوتا
